Urnietako XVIII. areto futbol txapelketa, balorazioa

Maiatzaren 28an amaiera eman zitzaion Urnietako XVIII. areto futbol txapelketari. Finalak eta ospakizunak igaro ondoren, balorazioa egiteko garaia da. Eta hori egiteko onenen iritzia bildu nahi izan du Aiurri astekariak. Ligan lehena Urnietako Bar Belandi izan zen, Errenteria aldeko CD Extremeño taldearen aurretik. Liga amaituta, final laurdenak eta finalaurreak jokatu ondoren txapela erabakitzeko unea iritsi zen. Eta finalean, Ligako lehen biak sailkatu ziren, Belandi eta Extremeño alegia.
Aurtengo txapelketa, beraz, biren arteko lehia izan da. Eta zinez parekatuta ibili zirela amaiera arte. Ligako bi neurketatan partidak berdinekarekin amaitu ziren. Finala ere ildo beretik zihoan, partida amaitzeko minutu gutxi gelditzen zirela Extremeñok gola sartu zuen arte.


Finala
Emilio, CD Extremeño:
"Nahiko polita izan zela esango nuke. Kosta egin zen gola sartzea, amaiera arte ez genuen sartu. Ligako partidatan bezala, bi taldeak parez pare aritu ginen. Oso lehiakorra izan zen, arazorik ez zen sortu taldeen artean. Faltan bota nuen harmailatan jende gehiago biltzea. Agian ostiral iluntzea ez da ordurik aproposena. Finaleko giro hori faltan bota nuen. Orokorrean ikusleen aldetik ikusle gutxi ibili da".

Carlos Florido, Bar Belandi:
"Ez genuen partida ondo bideratu, ez genuen guk aurreikusitakoa bete. Huts egin genuen bi jokaldietan eta horrela iritsi ziren bi golak. parekatuta iritsi ginen amaierara baina azkenean haiek irabazi zuten. Aipatu behar da haien artean federatu mailako jokalariak daudela. Gu, berriz, lagun talde bat gara. Txapelketan parte hartzeko beste koadrilatako jendearen laguntza jaso behar izan dugu".

Txapelketako balorazioa
Emilio, CD Extremeño:
"Altzako txapelketan ere parte hartzen dugu eta hangoa antolaketa hobea dela esango nuke. Han partidatan jokalarien fitxak aurkeztu behar dira, hemen ez. Urnietakoan arbitroak epaileak ez du mahain laguntzailerik eta hori arbitroarentzat oztopo handia da, hanka sartzeko aukera biderkatu egiten zaizkiolako. Antolatzaileen aldetik ere, egia esan, finala iritsi arte ez genuen inor ikusi Liga osoan zehar".

Carlos Florido, Bar Belandi:
"Antolaketak hartutako hainbat erabaki ez ditugu batere ondo hartu. Jokalari bakarra zigortu dute, gure taldekide bat hain zuzen. Protesta egiteagatik bi txartel hori atera zizkioten, eta ondoren partida batekin zigortu. Aldiz, bi jardunaldi atzera eginez, beste partida batean bi taldeen arteko lehian jokalari batek besteari muturrekoa eman zion eta hura ez zuten zigortu. Agerikoa da hainbat erabaki ez direla batere orekatuak izan. Gu alde horretatik haserre gaude, gu izan garelako kaltetu bakarrak.
Txartel horiak eta urdinak ordainarazi ziguten denboraldi erdian eta hori ez da zuzena. Hasieran jarritako arauak aldatu dituztela uste dugu, eta hori ez da zuzena.
Gainerakoan giro ona egon da oro har, inork ez dugu galtzea gogoko baina txapelketa bide onetik joan da".


Zer hobetu daiteke? 2011n zer?
Emilio, CD Extremeño:
"Pena da kiroldegikoaz gain, areto futbolean jokatzeko beste zelairik ez egotea. Belar artifizialeko zelaian jokatu behar izan dugu eta, nire ustez, areto futbolerako ez da batere egokia".
"Gure asmoa errepikatzea da, jarraitzeko gogoz gaude. Pozik amaitu dugu eta gure ideia jarraitzea da".


Carlos Florido, Bar Belandi:
"Esandakoa, jokalariak zigortzeko irizpidea bateratua izatea nahiko genuke. Gu Urnietakoak gara eta kaltetuen irten garela uste dugu"
"Guk datorren txapelketan jokatzeko asmoa badugu, jokatzeko gogoz gaude eta txapelketa egiten bada hor izango gara".